De eerste kwalsters natte sni'j Bin in de wieke modderbri'j Van pad en menning daeledaeld. Ze plakten an et keukenglas, Et glas, dat an de wiendkaant was En bin in 't aachterhuus verdweeld.
Ze jachten over 't vlakke laand De Westhoek deur. Een witte raand Lag in de li'jte van wat riet. Lag even, mar dan smölt ze vot, Want natte sni'j dat duurt mar kot. - De Westhoek in zien onderklied.
Ze jachten over Ni'jberkoop En dan in iene lange loop Et oosten in, naor Donkerbroek, Waor jonkvee in de lanen lopt, Mismoedig mit een roege kop. - De dag die is een sleuten boek.
Oneindig is de modderbri'j Oneindig daelt de natte sni'j In jacht van bujjen over 't laand. Ligt even, mar dan smölt ze vot, Want natte sni'j die duurt mar kot. - De stille dreiging van een haand.