Een bakker van vlak bi'j de Kuunder
een grote betoverde nuunder.
Daor zat et begin
van een zeemeermin in!
Now bakt hi'j ze nog even bruunder!

D'r was es een juffer in Vledder,
die wol hogerop, die wol vedder!
Ze scheurde per slot
zels heur kousen kepot.
'Want,' zee ze, 'dan hebb'ik een ledder!'

D'r was es een man in Noordwoolde,
die hadde knap last van de koolde.
Mar mit wat kejak
en een proempien tebak,
was hi'j vaeke al rap weer de oolde!

D'r was es een man - al wat oolder -
die kwam driefnat thuus uut de Poolder.
Hi'j nam een besluut:
trok zien bovenbroek uut
en hong 'm doe op an de zoolder! ...

D'r was es een boer in Ni'jlaemer,
die wol slimme graeg in de Kaemer.
Mar et vrouwgien zee: 'Nee,
want et zwat-bonte vee
uut de Westhoek oogt vule veurnaemer!'