• ene flesse görtepap (kärnemelkse)
• 'n allef pond rezienen, as 't kan grote rezienen met pitte
• een rookwörsien
• een stukkien gerookt deurregen spek
• een bussien värse kärvel
• stroop

Gruunmoes is een echt streekgerecht uut Overiessel en een deel van Gelderland. Et mut ok eel gezond wezen. Er wördt ezegd det et bloedzuverend is, det is vanwege de kruden die der in edaon wörren, en deurumme is et ok een echt kössien veur 't veurjeur en de zomer. Zo kunnen alle ongemakken van de lange winter weer verdreven wörren. Vrögger worren et elemaole zelf kleur-emaakt, mar tegenwoordig kuj kant en kleure görtepap kopen, en deur kuj ele lekkere gruunmoes van maken. Aj der een stuk gerookt mager spek in doen en een fikse rookwörst, dan kuj de boek wel op de lieste zetten. En lèkker, ie zöllen oe de vingers d'r bij of likken. Ie kunnen et best as een volledige middagpot eten, aj mar zörg daj een goed stukkien in de linkerand* emmen. Wees ok niet zunig met de strooppot, deur muj de gruunmoes zoas det altied enuumd wördt "mee ofmaken". Ie brengen de gruunmoes met de stroop mooi op kleur. 't Gezegde "'t Oge wil ok wat emmen" geldt altied nog. En aj soms een klikkien over emmen, is det de andere dag eel lekker um kold op te eten, veural as iet weer is.

D. Kasper-van Dijk

Bron: Jan in de zak en andere gerechten uit de regio - ISBN 90-6697-026 - IJsselacademie

* een stuk in de linkerand = een stuk vlees

Et stukkien spek en et wörsien opzetten met een bietien water en an de kook brengen. 'n Kwetiertien zachies laten koken.
Dan doej de gewassen rezienen bij et vleis en laat et nog 'n poosien deursudderen.
De kärvel wassen en fien snieden en in de panne doen.
Dan de görtepap der bij in en alles goed reurende tot an de kook brengen.
Et spek an plakkies snieden en de wörst in stukkies delen.
De stroop deur de gruunmoes reuren en smaaklijk eten.